404

الصفحه التي تبحث عنها غير موجوده

رواية سيد ريدي لنسيبة عثمان روايات سودانية 2020

0

سيد_ريدي

بقلم: نسيبة عثمان

الجزء 01



* ما تنسوا التصويت على اجزاء الرواية وما تحرموني من تعليقاتكم *



اتخطبت شهر 12 الفات من دكتور حلات الدنيا عليهو أدب وأخلاق واحترام ودين الحمدلله رب العالمين اسي اتزوجنا لينا زي شهرين الحمدلله مبسوطه معاهو وفي احسن حال وبحبني وشايلني في راسو سيد الناس وعندو ام ماشا الله عليها الله يحفظها ويديها العافيه من دخلت بيتها اعتبرتني بتها فرحانه بي وشفت منها كل خير وانا معتبراها أمي التانيه وشايلها في رأسي وربي يقدرني علي برها كفايه علي بس أنها ام سيد الناس دي الغاليه الجابتو لي من بطنها😍 وعندو أخت واحده دي السكر زاتها ومعتبراني أخت ليها حبيتها وحبتني طبعا عندو اخوان أولاد تاني اكبر منو وكلهم متزوجين علاقتي معاهم كويسه شديد وبينا الإحترام متبادل بس عندو اخوهو القبل القبليهو مرتو صحبتي شديد زوله ماشا الله عليها زوله الله الباقيات علاقتي بيهم كويسه كان اتعرفت عليهو في تريننغ كدا وبعديها العلاقه استمرت عادي سلام ومرحب واحترام صراحه انا كان عاجبني وعارفه قدري معاهو سيد الناس المهم آخر شهر 11كلمني انو هو عايزني وكدا قلت ليهو دا رقم أمي لو عندك حاجه قولا ليها وكنت مبسوطة وطايرة من الفرح قربت افضح نفسي وانطط ليهو المهم أتصل لي أمي وجاها في البيت واتكلم معاهو وامي شكلها انبسطت منو قالت ليهو ان شا الله يحصل الخير يا ولدي ورحبت بيهو وقالت ليهو نشوف اعمامها وتسألو مننا ونسأل منكم ويحصل خير قال ليها جدا يا خالتي الله يسهل الخير انا بجيكم تاني ومعاي أمي تتعرف عليكم وبعديها بنجي مع الرجال امي قالت ليهو خير يا ولدي وسيد الناس طلع وقلبي معاهو المهم قعدت مع أمي وقالت هي مرتاحه ليهو وانا قلت ليها اخلاقو وادبو دي انا واثقه فيها بس تقدرو تسالو وبعديها أمي اتصلت لي عمي قالت ليهو الحاصل وقال ليها يحصل الخير ونسأل منهم وفعلا عمي سأل منهم شديد وطلعو أسرة كلها مافيهم كلام ناس محترمين وناس دين وعمي اتصل لي أمي وكلمها قال ليها دا النسب الزي الدهب وقال ليها هو موافق عليهم وخلي الولد يتصل لي أمي قالت ليهو خير بعديها سيد الناس اتصل لي أمي وادتو رقم عمي وقالت ليهو اتصل ليهو وكلم أمي انو امو ح تتصل لي أمي المهم أمي التانيه حبيبه قلبي أم سيد الناس اتصلت لي أمي وقالت لي أمي نحن جاينكم بكرة معاي بتي وامي قالت ليها حبابكم وجونا الحلوين وسيد الناس وصلهم والمهم حبيتهم شديد بس كنت خجلاااااانه كدا ومرتبكه ما قدرت اتونس معاهم كتير كنت لابسه فستان اسود وفيهو حزام بالدهبي والفستان تلاته أربع الكم بتاعو ولابسه شبط زاحف بالدهبي وكنت عامله لي شعري حمام زيت في الكوفير وفكيتو وكنت عامله تشقير لي حواجبي وعامله روج بي لون هادي شديد وما عامله مكياج كتير عادي شديد بس كان مظهرني ع طبيعتي وكان حلو وكنت رايقه وراقيه أمي نادتني اسلم جيت سلمت عليهم وقعدت أم سيد الناس سالتني عروسنا الحلوه كيفك قلت ليها الحمدلله بخير تسلمي وانا برجف وبرد ليها بعديهو اختو حبيبتي جات قعدت جنبي واتونسنا ونسه عامه بس فهمت أنها زوله ظريفه وحبوبه بعد شويه سيد الناس جا وطلعو ليهو وقالو لي أمي ان شا الله نجيكم تاني ويحصل الخير أمي قالت ليهم أن شا الله بعد مشو سألت ماما الحصل شنو قالت لي ناس ماشا الله عليهم امو دي زوله صالحه وأنا ارتحت ليها وعمك قال ناس مافيهم كلام وسالتني استخرت قلت ليها اكيد يا ماما الله يسهل الخير بكره أمي اتصلت لي عمي سالتو عمل شنو قال ليها انو قابل سيد الناس وعجبو زول مافيهو كلام وسأل عنو شخصيآ ومشا ليهو في مكان شغلو وسأل عنو والناس كلها شكرو عمي قال لي أمي انا بتصل ليهو وببوريهو يجيب اهلو أمي قالت ليهو خير المهم بعد تلاته ايام جونا الرجال في البيت ماشا الله كانو كمممميه واهلي برضو كلهم جو وانا قاعده في البيت واجهز مع ناس أمي عادي عشان جو الرجال براهم النسوان جاين بكرة بعد شويه عمي جانا داخل قال والله الناس ديل عايزين يعقدو رايكم شنو أمي اتهجمت وانا نفسيآ م كنت جاهزة لي عقد لأني ما بعرفو شديد وفجاه يبقا راجلي عديل بس جواي كدا كان في جزء مبسوط وبنطط بس بيني وبين نفسي المهم تاني قلنا خير وعقدو وبعد شويه الزغاريد والناس تبارك لي وأنا حالتي بالبلا في المطبخ وهدومي اتوسخت ومنظري فظيع وكان معاي صحباتي وبضحكو في منظري بعد شويه ساقوني ومشيت غيرت وزبطوني وتاني أهل سيد الناس طلعو بس هو استذن عمي انو عايزني شويه ومشيت ليهو في الصالون وعمي طلع خلانا والناس مشو عاين لي كدا وقال لي مبروك يا ست البنات ربي يقدرني أسعدك قلت ليها الله يبارك فيك امييين وكنت مدنقرة وخجلانه قال لي دا شنو يا نوسه رفعت راسي قلت ليهو شنو ضحك قال لي ولا شي بس كنت عايز اشوف مرتي حبيبتي الخجلانه وطبعا أول مرة يعبر لي عن حبو وجات عفويه وحلوه شديد بس كنت خجلانه وما قدرت اتكلم كتير بعد شويه قام علي حيلو وقال لي الحلوه مرتي بكرة عندها جامعه امشي انا عشان اخليها تنوم وقام والابتسامه في وشو لي ا

الجزء 02

 سيد_ريدي
بقلم: نسيبة عثمان


ويقول البت الخفيفه دي كنت مبسوطه شديد وفرحانه انو سيد ريدي خلاص حقي برااي كنت خلاص ماشه انوم والوقت اتأخر وشايله هم الجامعه والمواصلات سمعت صوت تلفوني لقيتو سيد الناس قال لي بكرة ح اجي اوصلك بتطلعي كم بيني وبين نفسي قلت سبحان الله حس بي ولا شنو قلت ليهو لا لا ما تتعب وكدا زعل شديد وقال لي انا ما بستذنك سألتك الساعه كم وريتو وانا مهجومه انو زعل كدا قال لي ما تخافي انا ما شرير شديد قلت ليهو اي واضح الليله يوم عقدنا بي المناسبه ربنا يعين بس ضحك وقال لي ربنا يعينك والله اتونسنا والساعه3جات وبعديها قال لي يلا يا نوستي عشان بكرة ما اترفد من الشغل ونتشرد قلت ليهو يلا تصبح علي كل الخير وكنت نعسااانه وتعبانه ونمت زي 5ونص اتصل صحاني عاينت للزمن قلت ليهو ما نمت ولا شنو قال لي لا نمت بس صحيت الفجر قومي صلي حبيبتي بيني وبين نفسي حمدت ربنا كتير انو رزقني زول بشيل هم صلاتي وبذكرني بي ربنا قفلت منو ومشيت صليت وجهزت واتصل لي تاني قال لي انا جاي عليكم وما شربت الشاي جا وشرب الشاي معانا وطلعنا وصلني ومشا علي شغلو كنت ماعايزه أمشي بس هو اصر لازم امشي لازم امشي خلصت وهو كان لسه ما خلص اتصلت ليهو وكلمتو اني راجعه ع بيت عشان بعدين ناس بيتهم جاين قال لي تمام الله يحفظك ولمن تصلي كلميني وصلت البيت وكلمتو ومشيت نمت طوالي صحوني قالو لي امشي اجهزي كفايه نوم نسابتك جاين يجو يلقوك مبشتنه كدا مشيت الكوفير جهزت هناك ورجعني خالي البيت بعد المغرب كدا وصلو وسيد الناس معاهم 😍😍😍 لبسنا الدبل وانبسطنا شديد وقاعد جنبي وخجلللني بي حرركاتو وامو السكرة لاحظت ليهو قالت ليهو يا ولد اختشي وخلاص قوم عايزة اتونس مع بتي الحلوه دي حبيتها شديد في اللحظه قعدت جنبي وسيد ريدي زهجااااان انو قااام وبس نظراتو ماشالها مني وأنا زاتي بي جاي بس مركزة معاهو في الآخر امو قالت لي شكلي قعدت ليكم شوكت حوت ضحكت علي كلامها العسل زيها وبعديها مشو ومبسوطين ومرت الايام والشهور وكان الاتفاق العرس في عيد الضحيه الجاي


الجزء 03

 #سيد_ريدي
بقلم: نسيبة عثمان

اتفقنا انا وسيد ريدي عرسنا يكون عرس يرضي ربنا وقولت ليهو اقلهن مهرهن اكثرهن بركه وانا ما سطحيه و عايزه البركة اتبسط مني وقال لي انا كل يوم بتأكيد اني اخترت صح جا يوم العرس ما لبست زفاف وكدا لانو اصلا ما بحبو وعملنا جرتق وكان بنات بس صحباتي الحلوين كان فرحانين لي شديد وكان حلو وبسيط أخواتي كان بيتريقو علي وقالو لي بس كدا خلاص يعني العرس أنتهي ما اشتغلت بيهم كتير وكنت بس مبسوطة وانا وسيد ريدي بعد الجرتق رجعنا بيت اهلي غيرت ملابسي وودعت ناس البيت ومشينا بيتهم ودعنا امو وطياراتنا كانت الساعه 1 وانا للآن ما عارفه مسافرين وين حبيبي أبا يكلمني وكان طائر من الفرح بس ويتكشم لي وصلنا تايلند وكانت مفاجاه ظريفه والبلد حلووووة هناك اخدنا فيها15يوم ومشينا عملنا عمرة ورجعنا وكل يوم بكتشف فيهو صفات بتخليني احبو اكتر الله يديم محبتي في قلبك يا...... رجعنا السودان أول ما وصلنا مشينا بيتهم سلمنا وقعدنا شويه وداني بيتنا اسلم علي اهلي وقال ح يجيني بالمساء أمي شكلها فاقداني شديد حبيبتي من شافتني تبكي وسالتني من سيد ريدي كيف تعاملو وانا من جا اسمو الابتسامة لي الآخر ..... 


الجزء 04

 #سيد_ريدي
بقلم: نسيبة عثمان

اجر ليهو شقه قريب لي اهلو احدي ما نرتب امورنا ونستقر شويه ونمنا وصحاني صلاه الصبح صحيت وصليت وهو نزل المسجد جا راجع لاقني نمت في المصلايه قال لي نوسه نوسه قومي امشي ارقدي قلت ليهو لا لا احسن أجهز الشاي مشيت المطبخ وكنت بعمل في الشاي جا داخل جهز لي الصينيه وقال لي ما تتعودي شربنا الشاي وقال لي امي قالت نجي نفطر معاهم قلت ليهو حاضر زي الساعه10كدا كنت بجهز وهو بنقنق نوسه ما ممكن كفايه ياخ دي ساعتين ياخ وانتي بتجهزي قلت ليهو خلاص جهزت دقائق قال لي طيب سرعه المهم عشان ما يزهج طلعت ليهو كنت لابسه توب لامي اوف وايت بي لون زينب ولابسه شبط اوف وايت وعامله مكياج بسيط وراقي ومشينا استقبلوني حلو وكلهم قاعدين لي نسوان اخوانو واختو وامو وخالاتو وعماتو وبناتهم ويتونسو معاي في واحده كدا كانت بتعاين لي نظرات كدا ما فهمتها قالت لي انتي بتعرفي من متين قلت ليهو فترة بسيطه قالت لي بلاي غاظتني بلاي بتاعتها دي المهم تحمر لي ساي بس ما اشتغلت بيها بت خاله سيد الناس جات قعدت جنبي قالت لي انا حبيتك والله وانتي شكلك طيبه انا عايزة احزرك من سهام دي شايفه نظراتها ليك كلها حقد السبب أنها كانت متعلقه بي سيد الناس وهو ما شغال بيها وما بديها وش عشان كدا حاقده عليك قلت ليها تسلمي بس مامشكله انا ما شغاله بيها كتير بعد شويه سيد الناس جا داخل امو قالت ليهو امشي بي هناك يا ولد قال ليها مااااام ماااام عايز مرتي كلهم ضحكو ع العباطه بس احلي عباطه أمو قالت لي الله يعينك والله قال ليها اميين وشايفه بت خالتو تعاين لي ساي نظرات فظيعه دعيت الله يكفيني شرها جا قعد جنبي وقال لي براحه مشتاق ليك والله الساعه دي حسيت بيها كئيبه وانا قاعد بي هناك وبنات اهلو كلهم بعاينو لينا بي فرحه شديد ومبسوطين عشاانا ورجعنا بيتنا بعد نص ساعه كدا قال لي امو نحن ماشين ومشينا ناس أمي أول قعدنا معاهم وطلعنا بعد المغرب رجعنا بيتنا اتصل ليهو صحبو عازمنا بكره عندو في البيت عشاء قال ليهو جدا ان شا الله اتونسنا وقال لي عارفه انا بحبك شديد الله يخليك لي من دخلتي حياتي وأنا مبسوط من يومها قلت ليهو الله يخليك لي حبيبي أبو عيالي الحلوين قال لي اكيد حلوين مش انتي أمهم قال لي انا عايز 10 من اسي كلمتك عايز 6بنات و4 اولاد قلت ليهو شنوووو 10شنو كمان بري قال لي يازوله ديل أولادي عايز 10يعني عايز 10 وكان بتعابط طبعا ومن نبرة صوتو فهمت انو شويه وح يضحك علي منظري وخلعتي علي اولادو 10 واتعاورنا وضربتو بي المخده وعمل نفسو اتعوق وعمل نفسو خلاص تعبان ونظام الضربه اثرت قال لي اسي ترجعيني زي ما كنت ضربتك دي أثرت لي في مخي وانا عندي مستقبل وأولاد ههههههه الله يعيني

الجزء 05

#سيد_ريدي
بقلم: نسيبة عثمان


أصبح الصباح بي خيرو وبنتونس انا وسيد ريدي وطبعا بعد دا ح انزل الجامعه و هو نازل شغلو اتفقنا نقسم شغل البيت بينا انا بغسل الملابس كلها وكل زول يكوي براهو والبجي داخل البيت أول يغسل العده وينضف البيت والاكل ح نجيب واحده تطبخ مرة في الأسبوع بعرفوهو ناس خالتي وزوله مضمونه ونضيفه بجد مسؤوليه زمان يحليلك يا أمي كنتي تعبانه معاي وطبعا من اول يوم راجلي لمن جا خطبني أمي كلمتو البت دي ما بتعرف تعمل اي شي ههههه بس الحمدلله قال ليها مامشكله دي اصلا واسي هي زاتها مع الجامعه انا ماعايزا تعمل شي بس تكمل قرايتها الله يحفظك لي المهم طبعا بعدين معزومين عند صحبو جهزت توب كدا لون عنابي ظريف طبعا صحبو دا ما متزوج وعازمنا في بيت اهلو انا لاقيتو معاه قبل كدا زول حبوب وطيبان وقت الطلعه جا وحبيبي ينقنق كالعاده ههههههه اطلعي اطلعي المهم طلعنا وكانو ناس ظرررررريفين حبيتهم والله لاقيت امو واختو وعزمتهم يجوني في البيت وقالو خير طلعنا علي بيتنا الحنين وبعد بكرة نازله الجامعه طبعا راجلي جا أستاذ في الجامعه ح نمشي سوا ونرجع سوا وعندو ايام بالمساء شغال مستشفى ح امشي لي ناس أمي فتره شغلو وبجي يسوقني ونرجع دارنا أحلي حاجه في الزواج والاستقرار بتكوني عندك مملكه خاصه بيك ولمن تمشي بيت اهلك زياره بتكوني زي الغريبه كدا وضيفه بجد القال البت في بيت اهلها ضيفه صدق وإحساس الحب الحلال وانو كل سعاده زوجك وانتي سببها دي حسنات ليك وإرضاء زوجك برضي ربنا عنك احساس جميل ربنا يجعلني زوجه صالحه ويبارك لينا في زواجنا ويرزقنا ذريه صالحه انا سرحانه وبفكر كدا فجأه سمعت صوت نوسه نوسه رديت بخلعه ايوا حبيبي مالك قال لي انا من قبيل بتكلم معاكي وين انتي كلمتو اني سرحانه فيهو ومبسوووووووووطه انو ربنا رزقني بيهو ربنا يديم البينا في الدارين...


الجزء 06

 #سيد_ريدي
بقلم: نسيبة عثمان

الليله نازله الجامعه صحيت بدري شديد ونضفت البيت وجهزت الشاي ومزاجي ما تمام نهاائي ما متعوده علي الدرشه دي لكن بس اقول الحمدلله علي كل حال صحيت سيد الريد عشان يلحق الصبح في المسجد وانا صليت وبديت أجهز عشان شغاله بدري بعد نص ساعه كدا طلعنا من البيت وباين مزاجي عاديت بيهو الراجل دا من طلعنا ينقنق وزهجان من الشارع والزحمه والجوطه "معلومه مهمه حاولو بقدر الإمكان تختطلو بالناس السعداء السعاده بتتعادا والتعاسه برضو مش بقولو البجاور السعيد بسعد الله يسعدكم" وبعد دا العربيه اتعطلت في الشارع ودا الناقص وانا محاضرتي بعد ربع ساعه ح تبدأ الحمدلله قربنا للجامعه طوالي ولا كضبت قلت ليها انا بمشي بي ركشه ومشيت وخليتو بعد ساعه كدا اتصلت ليهو قال لي لسه مع موضوع العربيه وارجعي البيت لمن تخلصي وربنا يحفظك وكلميني لأني امكن اتأخر شويه قفلت منو وانا ما مطمنه ماعارفه لي بس قلبي واجعني بدون سبب لاحولا ولاقوه إلا بالله استغفرت كتير انا راجعه علي البيت حسيت اني ارتحت شويه وصلت ودخلت البيت حسيت بيهو كئيب وينك يا سيد الريد يانور البيت اتصلت ليهو كتير ما برد علي بس ما اهتميت بالموضوع امكن مشغول جهزت الغدا ومنتظراهو 😢 وكان عندي موضوع كنا بنخطط ليهو انا وسيد ريدي عندو صحبو شديد زول ماشا الله تبارك الله زول متدين وبخاف ربنا وكويس شديد وعندي صحبتي حسيت بيهم بشبهو بعض طوالي رشحتها لي صحبو دا وسبحان الله شاءت الأقدار والقسمه وعرسهم الشهر الجاي اتصلت لي صحبتي أشوف اخبارها والحاصل عليها لأني مقصرة معاها والله وفي نفس الوقت زهجت من القعده برأي اتونست معاها كتير وما انتبهت لي سيد ريدي بتصل وانا ما جاايبه خبر قفلت منها بعد نص ساعه لقيت زي10 مكالمات😮 الليله وووب رجعت ليهو ما برد ماعارفه الحاصل شنو والزمن مشا وانا قلقت شديد وتلفونو قفل كمان اتصلت لي ناس بيتهم ما في زول برد و ماعارفه اتصرف كيف اتكلمت مع أمي قالت لي اصبري شويه واقفلي البيت كويس عليك وان شا الله بجي وتعرفي الحاصل والكلام دا الساعه11 زي 12ونص اسمع صوت الباب وجرريت جري


الجزء 07

سيد_ريدي
بقلم: نسيبة عثمان

جريت علي الباب لقيتو سيد الريد ومبهدل وحالتو صعبه ومهمممموم شديد قلبي قرب يقيف سالتو مالك يا سيد الناس وين انت ولي ما بترد مشا وما رد علي دخل وغير ملابسو وما أتكلم معاي وانا ماشه وراهو و ماعارفه الحاصل في الآخر اتكلم قال لي نوسه معليش حبيبتي ارح جهزي شنطه ملابس لينا عشان نمشي قلت ليهو نمشي وين وفي شنو وانت مالك ما بترد قال والله مهموم وما انتبهت اني ما رديت انا مش كلمتك قلت ليهو كلمتني بي شنو انا من الصباح ما فاهمه شي آخر مره اتكلمت معاك قلت لي ارجعي البيت وبتجي بعديني قال لي اسف يا غاليه بس انا اتصلت ليك كتير وانتي مشغوله وتاني تلفوني قفل المهم أمي تعبت شديد واسي في المستشفى وانا من الظهر هناك وكنت جاري في المستشفى واسي راجع بس جيت عشان انتي براك انا اتهجمت وخفت علي ماما فاطمه شديد يحليلها حبيبتي المهم جهزت ملابسنا وغيرت طلعنا مشينا بيت أهل سيد الريد وصلنا زي 1ونص كدا والبيت مقلوووب خالاتو وبناتهم طبعا كلهم زعلانين باين عليهم مني وانا كر علي يايمه ماعارفه شي وبجد زعلت شديد من سيد ريدي لكن ح اعزرو شويه لانو دي امو سالتني سهام انتي وين يختي دي مش نسيبتك يا السمحه قلت ليها انا ما كنت عارفه ونسيبتي دي أمي عديل وربنا عالم في القلبي وربنا يقومها بالسلامة سيد ريدي جاني قال لي انا ماشي المستشفى اتصلو علي اسي وانتي خليك هنا مع خالاتي قلت ليهو لا لا ماشه معاك ما بقدر قال زينب اختي جايه اسي علي البيت وهي تعبانه احسن تهتمي بيها لانها حساسه وما بقدر اطمن عليها إلا معاك عليك الله يانوسه افهميني مافي طريقه تمشي معاي وبطمنك لمن أصل المهم سيد ريدي مشا وزوبه جات وكانت حالتها صعبه شديد ومتجرسه لانها جات داخله ولقت ماما فاطمة دايخه ودخلت في حاله هستريه وبكاء الحمدلله بس علي كل حال نامت زينب قريب الفجر وانا ما قدرت انوم اصلا اتصل علي سيد ريدي قال لي حبيبتي قومي صلي قلت ليهو حاضر اصلا ما نمت وطمني علي ماما فاطمة أنها بخير و وصاني علي اختو صليت ونضفت البيت بعد شويه الناس صحت وطالعين المستشفي اتصلت علي ناس أمي وريتهم وما كان في طريقه اطلع من البيت لانو الضيوف طالعين وداخلين وكنت خلاص حالتي بالبلاآ وصداع من عدم النوم وزينب متجرسه وراجلها متجرس عليها وأنا متجرسه لي نفسي هههههه وسيد ريدي لا اثر له اتصلت ليهو قال ماما فاطمة كويسه الحمدلله وطلعت من العنايه واسي هو راجع علي البيت وجعان😢 


الجزء 08

سيد_ريدي
بقلم: نسيبة عثمان

جهزت لي سيد الريد أكل وعصير وكنت مصدعه شديد من السهر والتعب دخل البيت والبيت نوووووور فاقداهو الساعات دي من تم العرس ما حصل افترقنا ساعتين يحليلو حبيبي كان شكلو مرهق ومقلق علي اختو طبعا زوبه دي اصلا هي البت الوحيده ودلوعه البيت سيد ريدي قبل ما يسلم علي سألني منها ومشي ليها وبعداك استوعب انو الكائن الحي اللي اسمو نوسه حالتو صعبه جاني تاني وعبر لي عن جوعو وعايز يأكل طبعا غااااظني شديد جبت ليهو الاكل وأخيرا قال لي نوسه حبيبتي انتي شكلك تعبانه شديد يلا ارح اوصلك البيت ترتاحي شويه وبعدين نرجع ونمشي المستشفى لانو أمي دي قالت عايزاك قلت ليهو جدا وطلعنا مشينا بيتنا ونمت طوالي صحيت لقيت الزمن مشا شديد وسيد الريد مافي اتصلت ليهو قال طلع مشوار قريب وراجع قمت وصليت وجهزت عشان نمشي المستشفي رجع وطلعنا علي المستشفي ماما فاطمه فرحت بي شديد يحليلها حبيبتي سلمت عليها وقعدت جمبها وباين عليها مضايقه شديد بس ماعارفه مالها وبعد دقائق كدا قالت لي سيد الريد يا ولدي عليك الله اطلع شوف اخوانك ديل بره عندي كلام مهم عايزه اقولو لي نسيبه بتي دي...




الجزء 09

#سيد_ريدي
بقلم: نسيبة عثمان

سيد ريدي طلع بره وماما فاطمه قالت لي يا بتي والله انا بريدك زي ولدي دا ومن يوم دخلتي علينا انا ما شفت منك إلا كل خير أمك الله يحفظها ليك ربت بجد و ولدي محظوظ ودا دعائي ليهو ربنا رزقو بيك قلت ليها يا أمي الله يخليك لينا ويقومك بالسلامه قالت لي انا بس عندي طلب وياريت توافقي عليهو الله يرضي عليك انا عايزاكم تجو تقعدو معانا في البيت زي ما شايفه انا كبرت وعمك كبير وزينب مشغوله بي بيتها وراجلها ما برضي يسكنو معانا و الاولاد كل زول بيتو واولادو شاغلنو وانا زاتي بصراحه عايزاك تكوني معاي انتي مع جامعتك والقرايه وانا ما بخليك تعملي حاجه بس تحركو علينا البيت والله يا بتي الجيران مابقصرو وداخلين ومارقين لكن انا خايفه يوم أكون برأي ويحصل لي يا حاجه قلت ليها يا يمه بعد الشر عنك و ماعندك مشكله نحن من الليله معاك بس نشوف رأي سيد الريد وكلامها اثرني شديد وختيت نفسي مكانها لو يوم أنا كبرت واولادي كل واحد من حته احساس صعب بجد بعد شويه سيد الريد جا داخل وقال لينا اها الاجتماع المهم دا خلص 😂 وطبعا عايز يعرف قلنا شنو ماما فاطمه قالت ليهو انتي ما بتخلي حركاتك دي دا كلام بيني وبين بتي وانت اطلع منو تاني قالت ليهو والله يا ولدي انا عايزاكم تجو تسكنو معاي وسبحان الله سيد الريد طلع اصلا مفكر في الموضوع بس كان عايز ياخد رأي بي رواقه وانا قلت ليهو ما عندي مشكله و ح نرحل في الايام الجايه ان شا الله بس شلت هم صراحه انا لمن نرحل الالتزامات حتكون علي اكبر في بيتنا انا وسيد الريد مقسمين بينا كل شي بس هنا ماما فاطمه زوله كبيره في السن وانا مستحيل اخليها تشتغل في البيت لو شي بسيط لازم اهتما بيها وهي وعمي واراعيهم سيد الريد ما بقصر لانو ديل امو وابوهو بس هو ما قاعد طوالي في البيت بس بحمد ربنا انو رزقني بيهو وبي اهلو الطيبين وطبعا كما تدين تدان البعملو اسي بعدين أولادي ح يعملو لي بعد المستشفي مشيت لي ناس أمي في البيت لي زمن منهم اطمنت عليهم وكلمت أمي أننا راحلين بعد اسبوعين لو ربنا أحيانا قررت أبيت مع ناس أمي اتصلت علي سيد الريد استذنتو لو ممكن أبيت وقال لي جدا بس الصباح لازم امشي الجامعه وح نتلاقي هناك احلي حاجه عندنا ماده السنه دي سيد الريد بدرسنا ليها 😍😍 أصبح الصبح بي خيرو وطلعت علي جامعتي في رقم كان بتصل علي طوالي وانا ماعارفه دا منو وفتحت الخط واتهجمت شديد من الكلام السمعتو لاحولا ولاقوه إلا بالله 


الجزء 09

#سيد_ريدي
بقلم: نسيبة عثمان

سيد ريدي طلع بره وماما فاطمه قالت لي يا بتي والله انا بريدك زي ولدي دا ومن يوم دخلتي علينا انا ما شفت منك إلا كل خير أمك الله يحفظها ليك ربت بجد و ولدي محظوظ ودا دعائي ليهو ربنا رزقو بيك قلت ليها يا أمي الله يخليك لينا ويقومك بالسلامه قالت لي انا بس عندي طلب وياريت توافقي عليهو الله يرضي عليك انا عايزاكم تجو تقعدو معانا في البيت زي ما شايفه انا كبرت وعمك كبير وزينب مشغوله بي بيتها وراجلها ما برضي يسكنو معانا و الاولاد كل زول بيتو واولادو شاغلنو وانا زاتي بصراحه عايزاك تكوني معاي انتي مع جامعتك والقرايه وانا ما بخليك تعملي حاجه بس تحركو علينا البيت والله يا بتي الجيران مابقصرو وداخلين ومارقين لكن انا خايفه يوم أكون برأي ويحصل لي يا حاجه قلت ليها يا يمه بعد الشر عنك و ماعندك مشكله نحن من الليله معاك بس نشوف رأي سيد الريد وكلامها اثرني شديد وختيت نفسي مكانها لو يوم أنا كبرت واولادي كل واحد من حته احساس صعب بجد بعد شويه سيد الريد جا داخل وقال لينا اها الاجتماع المهم دا خلص 😂 وطبعا عايز يعرف قلنا شنو ماما فاطمه قالت ليهو انتي ما بتخلي حركاتك دي دا كلام بيني وبين بتي وانت اطلع منو تاني قالت ليهو والله يا ولدي انا عايزاكم تجو تسكنو معاي وسبحان الله سيد الريد طلع اصلا مفكر في الموضوع بس كان عايز ياخد رأي بي رواقه وانا قلت ليهو ما عندي مشكله و ح نرحل في الايام الجايه ان شا الله بس شلت هم صراحه انا لمن نرحل الالتزامات حتكون علي اكبر في بيتنا انا وسيد الريد مقسمين بينا كل شي بس هنا ماما فاطمه زوله كبيره في السن وانا مستحيل اخليها تشتغل في البيت لو شي بسيط لازم اهتما بيها وهي وعمي واراعيهم سيد الريد ما بقصر لانو ديل امو وابوهو بس هو ما قاعد طوالي في البيت بس بحمد ربنا انو رزقني بيهو وبي اهلو الطيبين وطبعا كما تدين تدان البعملو اسي بعدين أولادي ح يعملو لي بعد المستشفي مشيت لي ناس أمي في البيت لي زمن منهم اطمنت عليهم وكلمت أمي أننا راحلين بعد اسبوعين لو ربنا أحيانا قررت أبيت مع ناس أمي اتصلت علي سيد الريد استذنتو لو ممكن أبيت وقال لي جدا بس الصباح لازم امشي الجامعه وح نتلاقي هناك احلي حاجه عندنا ماده السنه دي سيد الريد بدرسنا ليها 😍😍 أصبح الصبح بي خيرو وطلعت علي جامعتي في رقم كان بتصل علي طوالي وانا ماعارفه دا منو وفتحت الخط واتهجمت شديد من الكلام السمعتو لاحولا ولاقوه إلا بالله 


الجزء 10

#سيد_ريدي
بقلم: نسيبة عثمان

لاحولا ولاقوه إلا بالله استغفري ربك عيب الكلام البتقولي فيهو دا لاحولا ولاقوه إلا بالله اللهم اهدي وأصلح الحال وقفلت الخط طوالي سهام دي ربنا يعينها علي نفسها مستحيل تكون طبيعيه للآن ما قادره استوعب أنها تتصل علي تقول لي انا راجلك دا حقي انا وما بخليك تتهني بيهو وكمان جايه تسكني عن ناس خالتي طبعا صدعت شديد وكلامها اثر فيني ما عشان القالتو بس زعلانه عليها وعلي شبابها وتفيكرها في واحد بي بيتو حتي لو سيد ريدي انا الله يهديك يا سهام بت علويه قررت بيني وبين نفسي ما ح احكي لي زول بي كلامها حتي سيد الريد مافي داعي اصلا لكن لو اتصرفت تصرف ما واعي تاني إلا سيد ريدي وبيتي خط أحمر وصلت جامعتي واتصلت علي سيد القلب وجاني قال لي نوستي والله مشتاق ليك شديد يا غاليه الايام دي بقينا زي المشردين كل زول في مكان وانا لسه كلام سهام بت علويه في رأسي وهو لاحظ لي قال لي مالك في حاجه قلت ليهو لا لا أبدأ مافي حاجه حبيبي بس مصدعه شويه ويحليلو سيد ريدي قلق علي شديد قال لي انا حاسي انو انتي مضايقه من شفتك ما علي عادتك لكن تخلصي وترجعي البيت طوالي وانا ما بتاخر بعدك كتير ومشيت محاضرتي اغرب حاجه لمن كنت معاهو جاتو مكالمه وانزعج منها شديد خلصت ورجعت البيت جااايط وحالتو كعبه نضفت بيتي وجهزت الاكل وغيرت ملابسي واتعطرت وبخرت البيت سمعت صوت تلفوني قبل ما أصل عليهو لقيت سيد الريد فتح الباب ودخل سألني مالك يا نوستي قلت ليها دا ما انت يعني الاتصلت لي قال لي لا لا شوفي منو امكن أمك لقيتها سهام وسألني منو طوالي كلمتو أنها سهام بت علويه لاحظت لي ملامحو كلها زعل قال لي البت دي لازم تنعدل وبي زعل بسالني قبل كدا اتصلت انا اتخلعت ومن الاسلوب ولي زعلان كدا حتي لو اتصلت في النهايه بت خالتو رديت ليهو ايوا سيد الريد اتحول لي كائن اخر و ورفع صوتو علي شديد بدون سبب وزعلت ودخلت غرفتي وقفلت الباب وبكيييييييييييييييييت وقمت صليت ركعتين وارتحت شويه بعد ساعه سيد الريد جاني نوسه افتحي عايز اتكلم معاك وما رديت ليهو وامكن قريب نص ساعه في الآخر فتحت ليهو وقلت ليهو نعم قال لي انا اسف حبيبتي انا بس مضايق منها البت دي وما كنت عايز بينكم اي تواصل قلت ليهو اصلا ما بينا تواصل وهي اتصلت قبيل وأول مره تعملها وقالت لي كلام ماحلو وانا عشان بحترمك وانت تاج راسي وراجلي وهي بت خالتك احتفظت كلامها لي نفسي قال لي انتي كل يوم بتكبري في نظري اكتر وانا بس اقول الحمدلله والشكر لله يا نعمه من رب السماء قال لي عارفه هي من صغيره ماكان في زول بهتمي بيها وخالتي علويه زوله طبعها حاد وسهام كان معظم الوقت بتكون معانا في البيت وامي عشمتها اني ليها وهي لي بس انا ما كنت بشوفها غير هي أخت ما اكتر وما قدرت أفكر اني ارتبط بيها ولمن انا خطبتك سهام دي قربت تنتحر بس لحقوها ربنا يهديها ويوم العرس ماجات وانتو اتلاقيتو في بيتنا وانا زوبه حكت لي الحصل واحترمتك جدا انك حتي ماحكيتي لي حاجه وما اثر فيك عشان كدا بس ما تشتغلي بيها وما تردي ليها زي ما انا بعمل ودا لي مصلحتها هي عشان تفكر في حياتها وتطلع من القوقعه دي قلت ليهو انا زعلانه من أسلوبك شديد اسمعني في الاول وبعديها قول العايزو و سيد الريد اضايق من زعلي وأعتذر شديد وسامحتو بيني وبين نفسي لكن ما بينت ليهو عشان تاني توووبه يعاملني كدا قلت ليهو خير بس ما بقدر اسامحك طوالي انا ما اتعودت علي الاسلوب دا في حياتي لكن انا جهزت الاكل غير ملابسك ولحظات اجيبو ليك قال لي يا سلام والله اشتقت لي اكلك المحروق وملحو كتير وعامل فيها بتظارف بس سفهتو ومشيت يحليلو حبيبي بس يستاهل عشان يعرف يتعامل معاي بي أسلوب كويس حتي في الزعل.


الجزء 11

#سيد_ريدي
بقلم: نسيبة عثمان

عدت الايام واتصالحنا اكيد الحمدلله ورحلنا في شقه مع ناس ماما فاطمه والحمدلله صحتها رجعت ليها وبخير الليله سد مال بت خالتي أروي بت ماما محاسن ومن أمس معاهم طبعا أروي دي ماشا الله عليها زوله الله وزوله ظريفه وهي صيدلانيه خطبها دكتور شغال معاها في الصيدليه وزول ماشا الله تبارك زول ملتزم ومتدين فيهو صفات كتيره هي حكت لي أنها كل الصفات اللي اتمنتها لقتها فيهو وعشان كدا الفال تحت اللسان دي ماساي صدق القالها دائما اتفاءلو بالخير تجدوه طبعا سيد الريد من أمس ندمني اني ما رجعت البيت كل دقيقه بتصل ويقول لي عايز اطمن عليك ويقفل وتاني يرجع يسالني بعمل في شنو وتاني يتصل والله البيت ما بتقعد بدونك في الآخر اتصل لي قال لي رائك شنو اجي ارجعك عاينت لي الساعه زي 2 صباحا قلت ليهو مستحيل بعد دا ارجع وانت زاتك نوم بعد دا عشان بكره شغال بدري المهم قفل ورجع لي صلاه الصبح هههههه طبعا حسسني انو طفل صغير بالحركات دي وامو طلعت مشوار واليوم كلو كان صعب بس حلو شديد وسد المال كان ظريف شديد وماما فاطمه جات مع سيد الريد ورجعت بيتي معاهم اول ما دخلت البيت قال لي نوسه تاني ما عندي بيتان بره البيت انا أمس الليل كلو مساهر وزهجان قلت ليهو حاضر يا سيد ريدي وكان مزاجي رايق ومبسوطه اتونسنا كتير وفي خبر ظريف طبعا سهام بت علويه اتخطبت واتعدلت الحمدلله وحياتنا استقرت اكتر الحمدلله وكل يوم بكتشف قيمه سيد الريد في حياتي وقيمه الزوج الصالح اللي بعين علي الاخره قبل الدنيا ربنا يرزقنا الذريه الصالحه ويبارك لينا في حياتنا وسيد الريد جاتو فرصه في جامعه في السعوديه وكويسه شديد معاهو بس شايل هم امو وابوهو ونحن الاتنين عاملين موضوع للبيت وماما فاطمه مبسوطه بي وجودنا معاها شديد وطبعا اندمجت معاها شديد وعزمت يوم جاراتها عرفتني عليهم ولمن يكون عندها مشوار بتقول لي ارح معاي واتعودت علي وجودي في حياتها اسي محتارين نقول ليهم كيف وسيد الريد قال لو ماما فاطمه قالت لا ما تمشي هو ما ح يمشي كنا بنتناقش واسي نازل يكلم امو وابوهو ويشوف رأيهم ..


الجزء 12


#سيد_ريدي
بقلم: نسيبة عثمان


سيد الريد نزل لي اهلو وانا كنت مقتنعه تمامآ انو ربنا ح يسهل عليهو كل خير عشان كدا ما شايله هم وما نزلت معاهو في النهايه هم اسره واحده قبل ما انا ادخل بيتهم والحمدلله ماما فاطمه بتحبني شديد ومعتبراني زي بتها لكن ما عندي أي حق اني أتدخل او اقول رأي بين أم وولدها وسيد الريد اتأخر بعد شويه سمعت صوت تلفوني رديت لقيتو سيد الريد قال لي تعالي لابست توبي ونزلت ليهم سلمت علي عمي وماما فاطمه ولقيتها متأثره وباين عليها كانت بتبكي قالت لي يا بتي انتي رائك شنو قلت ليها يا أمي انا متاكده ربنا قاسم لينا الخير في كل مكان ورضاكم أنتو الأهم علينا عشان ربنا يبارك لينا وسيد الريد اصلا قال الراي رأيك أنتي وبكت يحليلها قالت هي ما بتقدر انو نبعد عنها وهي ما صدقت انو جينا معاها وكمان عايزين نخلي ليها البلد هدينها وقلنا ليها خلاص اعتبري الموضوع انتهي بس حسيت بيها مضايقه لسه واتونسنا معاهم شويه وطلعنا بيتنا سيد الريد قال لي تفتكري كدا احسن قلت ليهو ماما فاطمه رضاها هو المهم قال لي فعلا يا نوستي الله يسهل الخير وكان عندو تصحيح ورق امتحان وزهج منو قال لي ارح نطلع اي مكان كنت مرهقه بس شفت في وشو الحماس للطلعه جهزت سرعه وطلعنا وما مشينا مكان هههههه لفينا بالعربيه وبنتذكر ايام الخطوبه والعقد وأول مرة اتلاقينا سبحان الله اول مرة اتلاقينا انا ما كنت بعرفو بس صحبتي بتعرفو وسالتها عنو وبعد 3سنه اتلاقينا في الترينغ في المستشفي وربنا أراد القسمه رجعنا علي البيت اتونسنا ونسه ظريييفه وصلنا زي 3صباحا بس لمن دخلنا البيت سمعنا صوت ماما فاطمه بتبكي سيد الريد انزعج شديد وفتح الباب...




الجزء 13


#سيد_ريدي
بقلم: نسيبة عثمان

فتح الباب وسامعين صوت ماما فاطمه لقيناها قاعده في المصلايه وبتبكي قلنا ليها يا أمي مالك ماما فاطمه اتهجمت لمن شافتنا وقشت دموعها سيد الريد قعد جمبها في الأرض وقال ليها أمي مالك ان شا الله خير قالت ليهو خير يا ولدي مافي حاجه اتذكرت بس زمان أمي كانت بتقول ليك أولادك انتي يا فاطمه اولاد الرضا ولاده خلقه وأخلاق وأنا يا ولدي راضيه عليك وعافيه ليك في الدنيا والآخرة وربي يعلي مقامك ويرفع شأنك وموضوعك القبيل كلامي انساهو وانا راضيه عليك محل ما تمشي ربنا يسهلا عليك وقوم اسي انت ومرتك اطلعو بيتكم والصباح بي خيرو سلم علي ماما فاطمه في رأسها وطلعنا بيتنا والفجر كان قرب صلينا وعملت الشاي لي سيد الريد ومشيت نمت كنت نعسانه شديد صحيت قبل الظهر غيرت ملابسي وفطرت وانتظرت الظهر صليت ونزلت لي ماما فاطمه اتونست معاها وسالتني من ناس أمي وقالت عايزه تمشي ليهم في البيت طولت منهم واتفقنا نمشي بعدين العصر وكان بالي مشغول بعرس بت خالتي وعرس صحبتي والجامعه وسؤال ماما فاطمه اها يا بتي مافي جديد كدا ولا كدا المهم ربنا يقسم الخير سيد الريد جا داخل و البيت نور سالتو عن يومو وحكا لي طبعا نحن اتعودنا انو نحكي لي بعض كل تفاصيل يومنا انا بحكي بتفاصيل التفاصيل وسيد الريد بطبعو وشخصيتو بحكي المختصر المفيد كلمتو أنو ماشين بيت اهلي وقال جدا لكن بعد المغرب عشان هو مرهق بعد المغرب طلعنا مشينا وامي فرحت بينا شديد رجعنا بيتنا متأخرين كنت مصدعه بس المطبخ العدة مبالغه وحاله صعبه دخلت المطبخ وبديت أغسل فيها وأنا اصلا مابحبها نهاائي بتجيب كثافتي سيد الريد جاني ساعدني شويه وهو معاي جاتو مكالمه ..




الجزء 14


#سيد_ريدي
بقلم: نسيبة عثمان

جاتو مكالمه من زوبه عايزه تسلم وكدا بعد قفل قال لي عارفه يا نوسه ما تتخيلي زينب دي انا بريدها ها كيف رغم انها اكبر مني بس دايما عندي احساس انا مسؤل منها وانا الاكبر حتي بعد اتزوجت قلت ليهو ربنا يخليها ليك ضحك قال لي الغالي شكلو غيران بريدها بس انتي الحب والريد وست الريد ربنا ما يحرمني منك.. حبيبي سيد الريد كل يوم بكتشف انو حبنا بذرة وبتكبر يارب يارب يارب تحفظو لي وتجعلو قرة عيني وتجعلني قرة عينو السعاده والحب احساس راقي ونعمه من ربنا ربنا يحفظها لي ويسعدنا في الدارين... أصبح الصباح بي خيرو وسيد الريد عندو محاضره بدري طلع وانا كنت بنضف في البيت والليله طبعا ماشه لي سهام مع ماما فاطمه الساعه11طلعنا بيت خاله سيد الريد علويه ولاقينا سهام سبحان الله مغير الاحوال اتحولت كائن آخر ههههههه وكانت ونسه ظريفه وفرحو بي جيتنا المهم قبل ما نطلع سهام قالت لي نوسه عايزاك دقائق طبعا انا مخلوووعه ونوسه عديل عاد يا سهام ما اظن بتمثلي قلت ليها جدا مشيت معاها قالت لي انا صراحه خجلانه منك والله بس حبيت احكي ليك الحمدلله انا مبسوووووطه في حياتي وعرفت أنو البختارو ربنا هو الخير لينا وانا بعتذر ليك شديد من تصرفاتي الطايشه الزمان وعرفت انو انا كنت موهومه بس عشان بس فكره اترسبت في رأسي انو سيد ريدك لي لكن الحمدلله اسي أحمد ربنا علي النعمه العندي وربنا يسعدكم ويفرحكم يارب قلت ليها يا سلام يا سهام بجد ربنا يكملك بي عقلك ويسعدك انتي كمان بنتكلم كدا سمعت صوت ماما فاطمه بتناديني...


الجزء 15


#سيد_ريدي
بقلم: نسيبة عثمان


مشيت ليها ايوا يا أمي قالت لي ارح علي البيت بعد دا قلت ليها حاضر وودعت سهام وخالتو علويه وطلعنا ماما فاطمه قالت لي يا بتي شايفه سهام بتكلم معاك ان شا الله ما ضايقتك قلت ليها لأ لا والله بالعكس اتونست معاي وقالت لي كلام سمح قالت لي الحمدلله يا بتي انا سهام دي بريدها من صغيره قعدت معاي في البيت اكتر من قعدتها مع أمها وطبعا ماما فاطمه زوله حنينه وطيبه ربنا يخليلها لينا وصلنا البيت وطلعت علي بيتي جهزت الغداء عشان سيد الريد بعد دا بجي دقائق وفعلا جا داخل سألني من يومي وحكيت ليهو الحصل وانبسط شديد وكنت حاسه بي صداع غرريب كلمت سيد ريدي قال لي يا نوسه انتب ما بتاكلي غالبا انيمياء قلت ليهو خلاص بعدين نمشي افحص وسيد الريد قال لي امشي اسي اجهزي ارح مع انو كان تعبان ومرهق بس أصر نمشي والمعمل الدكتوره زميله سيد الريد وكانت دفعتو تتكشم ساي ليهو غاظتني شديد قربت اقول ليهو خلاص ما عندي اي حاجه يلا بيتنا فحصت وقاعدين منتظرين النتيجه جاتنا مبسوطه قالت ليهو يا دكتور المدام ما عندها اي حاجه الحمدلله ومبروك حامل طبعا انا ما استوعبت كلامها وسيد الريد كمان بعد شويه مسكني من يدي ونسي الدنيا والدكتوره زميلتو بس فرحتنا كان اكبر من كل شي طلعنا من المستشفي و في العربيه قال لي نوستي يا احلا قدر في حياتي ربي يحفظك لي ومايحرمني منك يوم ما تتخيلي انا مبسوط وفرحان كييف الحمدلله والشكر لله..



الجزء 16

 #سيد_ريدي
بقلم: نسيبة عثمان


كنت مبسوطه شديد بي سيد ريدي اللي ح يكون أبو عيالي ربي يخليك لي ونربي عيالنا احسن تربيه ويكونو صالحين وبارين بينا الصباح كدا قلت ليهو انا خجلانه اكلم الناس كيف ضحك علي ومشا يجهز الشاي وانا ما كنت عارفه قمت وراهو قال لي لا لا تاني انتي ممنوعه من المطبخ دا قلت ليهو حبيبي ما ينفع كدا وانا م عندي مشكله قال لي انا عندي مشكله امشي ارتاحي مشيت جوة وكنت بجد مصدعه ودايخه اتفقنا أتابع مع دكتورة و مشينا سوا في نفس اليوم والدكتورة كتبت لي فايتمنات وقالت لي الراحه اهم شي في الفتره دي سيد الريد قال ليها اكيد تسلمي وطلعنا وعدت الايام والشهور وانا اسي حامل في شهري 5 وحامل بي توأم طبعا وسيد الريد مبسووووط بي اولادو لكن خلاص بعد دا رتب امورو هنا ومسافر بعد اسبوع وانا طبعا مافي طريقه عشان الجامعه رجعت بيتنا وكنت زي الغريبه فيهو ومشتاقه لي حبيبي شديد الله يرجعك لي بالسلامه سالم وغانم كان بتصل لي طوالي بس فاقداهو شديد وبعد دا مواعيدي فضل ليها زي أسبوع بس وسيد الريد مافي طريقه يجي اسي ومتاااااااثره شديد انو ما معاي لكن كلو لي خير بس وعدني ح يجي بعد أسبوعين او اكتر..... والحمدلله اتحليت بالسلامه وجبت بتين حلات الدنيا عليهم وحبيبي ما قدر يجي بس وعدني ح يجي بعد ايام كنت محتاجاهو شديد وصل قبل يوم السمايه بي يومين وكان طااااير من الفرح بي بناتو وعزم الدنيا والعالمين للسمايه وانا كنت مشتاقه ليهو شديد نفسي يكون قاعد معانا انو وبناتي لكن عشان الضيوف والحركة والنسوان مافي طريقه يوم السمايه بالليل جا بات عندنا وماما فاطمه وزوبه وماما فاطمه فرحانه بي بناتها ديل شديد ربنا يخليلها لينا يارب وتحضر عيالنا كلهم وتحضر ليهم كل الخير الغاليه ام الغالي وكان أصحابو طالعين ومارقين وبي جاي النسواين ما فضل لي إلا اقول ليهو ارح نهرب نفسي اتونس معاك زي1صباحا بس ناس أمي وديل لسه بتونسو براحه قمت اتصلت ليهو قال لي انا في الصالون معاي محمد بس تعالي مشيت ليهو واتونست معاهو ومحمد اخوي قاعد ما فضل لي إلا اجدعو بي شبشبي عشان يتخارج ياكافي البلاء نص ساعه ما تمت البنات البكاء والصريخ أمي جاتني قالت لي تعالي شوفي بناتك ديل يابت مشيت معاها والبنات نامو ونمت معاهم زي الفجر كدا الناس صحت الجوطه صحيت والازعاج وكنت ما نايمه كويس وكانت السمايه فطور المهم كان يوم متعب شديد بجد وعدا وابو سحر وسمر 😉راجع بكره المهم قال لي عايز اتكلم معاك شويه بس كلمت امي للبنات و مشيت ليهو واتونسنا وفرحانه شديد وبجد هو قدامي ومشتاقه ليهو حبيبي بعد ساعه كدا بناتي الجوطه بدت جا وقعد معانا انا والبنات و قال لي انا ماشي البيت ح أبيت هناك قلت ليهو خير مشا ونومت البنات ونمت كان امتحاناتي بعد شهر صحباتي ما قصرو وبجييو لي الشيتات لي البيت وكنت بذاكر برأي وجات الامتحانات بمشي امتحن وبخلي جوز اللوز مع أمي وخلصت امتحاناتي وسيد الريد كان واقف معاي مع انو مشغول بس متابع معاي خلصت الامتحانات وسافرنا ليهو و البنات عذبووني لأني برأي لكن الحمدلله ربنا يحفظهم لي هم وابوهم كان مبسوط بي جيتنا قال لي انا لمن ندمت علي سفرتي بلا غربة بلا هم الاستقرار مافي زيو قلت ليهو حبيبي الصبر أقل من سنه ان شا الله ونكون معاك الخدمه زاتها ملحوقه وقعدنا معاهو زي شهرين وكانت حلوه بس عذاب مع البنات والبيت وسيد الريد عايش دور نظام كنت وحيد وفاقداكم وعايز أكل كدا ونفسي في كدا والعزومات والاصحاب لكن كلو يهون عشان خاطرك يا سيد الريد..




الجزء 17

#سيد_ريدي
بقلم: نسيبة عثمان

الحمدلله رب العالمين الليله كان تخريج التومات من الجامعه وكانت فرحتين بخطوبه سمر سبحان الله قبل 23 سنه كان خطوبتنا انا وسيد الريد وفي نفس التاريخ 4/12 السنين والأيام عدت بخيرها وشرها ونحن كبرنا وبذرة حبنا كبرت معانا ومعاها المودة والرحمه والميثاق الغليظ البينا وكل يوم بحمد الله علي نعمه الزوج الصالح البعين علي الاخره قبل الدنيا وهزتنا جدا وفاة ماما فاطمه قبل 4 سنه بس دي الدنيا كدا وربنا يجمعنا بيها في جنات النعيم ورجعنا السودان قبل 6 سنه عشان قرايه البنات وعبدالله ومحمد وجوان الصغيره ماما فاطمه الله يرحمها ما قصرت معانا و كانت لي اكتر من ام وعلمتني الصبر والحكمه وكانت بتقول لي الدنيا بتمشي علي الله بس خلي همك الاخره ورضاء زوجك عشان تسعدي في الدارين و عبد الله ولدي كان قريب ليها شديد بتقول لي دا شايل اسم جدو بشيل ربع الصفات السمحه سميناهو علي عمي ابو سيد الريد في نفس سنه وفاتها كان عبدالله ختم المصحف فرحت بيهو شديد الله يرحمها يارب بيقرا في سنه تالته جامعه ومحمد ممتحن شهاده سودانيه طبعوو زي ابوهو في كل شي حتي طريقه الكلام سبحان الله وجوان في أولي ثانوي طبعا نظام الصغيره وأبوها وعمتها زينب مدلعناها شديد غايتو بس الله يهدي ويصلح الحال و سهام بت علويه اتغييييرت شديد وبقت شخصيه تانيه وماشا الله اسي عندها 7 اولاد ربنا يحفظهم وكلهم أدب وأخلاق اسي ساكنه قريب لينا وطوالي مع بعض سبحان الله مغير الاحوال من بعد عداوة محبه وزينب وفاه ماما فاطمه أثرت فيها شديد وسيد الريد اتكلم مع راجلها واخوانو واتفقو كلهم يسكنو في البيت الكبير اسي كلنا سوا والحمدلله علاقتنا طيبه وطبعا صحبتي أنفال الكان رشحتها لي صاحب سيد الريد اسي ماشا الله اتزوجو وعندهم 4 بنات و ولد ومستقرين في بريطانيا.... بعد صلاه الصبح قاعده في مصلايتي سيد ريدي جا داخل من المسجد صبحت عليهو وشكلو مبسوط سالتو مالك يا قلب نوسه قال لي ما في حاجه الله يخليلك لي انتي والاولاد خطوبه سمر أمس ذكرتني ايامنا الأولي واسي الزمن مشا وكبرنا واولادنا كبرو وعايزين يستقرو بي حياتهم بعد دا وعرفت نعمه الحب البينا بعد كم سنه كدا الشباب كلهم يستقرو ونفضل انا وانتي في بيتنا و ان شا الله ما نفترق في الدنيا والاخرة وتكوني لي خير معين في الدنيا والآخرة واكون ليك عيونك وقلبك ومعين في الدارين وبالمناسبه ح نرجع لي أيامنا الاولي بعد الشباب ديل يمشو 😍 بس عندي طلب يا نوسه هههه قلت ليها طلباتك أوامر احكي يا سيد ريدي قال لي بس نرجع أيامنا الاولي بدون اكلك المحروق وملحو الكتير... سيد ريدي قصه من وحي الخيال كانت ايام جميله وأول محاوله كتابيه لي في شكل روايه اتمني تكونو استمتعو بيها ومبسوووووطه جدا بيكم وشكرا علي تشجيعكم لي وان شا الله قريب ح أكتب تاني.... نصيحه لي أخواتي السمحات قصه سيد الريد ممكن تكون قصه حقيقه لي أي واحده فيكم وبمنتهى البساطة بس اهم حاجه الاختيار الصح والدين والاخلاق هي الأساس وأي حاجه تانيه هي ثانويات الله يسعدكم ويفرح قلبكم ويرزق كل واحده بي سيد ريدها

أختكم نسيبه عثمان ☺☺

....... الـنـهـايـة ........